Jetz si för öis die schönschte Täg, d`Fasnacht esch der Hit. Ar Fasnacht si mer immer zwäg, die macht öis richtig fit. Am Mittwoch de, mer mache-n-e Wett, si mer 5 de schwärchrank im Bett.
S`Rita die zwöit bsuecht z`Mümliswil d`Kla-si-o-na-ta. Ohni Bröue erreicht äs s`Ziel ei Ka-ta-stro-pha. Im donkle Saal bim beschte Wöue, gsets nüt au mit der Sonnebröue.
D`Hardegg esch zue – s`Waldis si wäg, im Dorf heschs chum vernoh. Stöu und heimlich dasch der Gäg, si uf und dervo. Absched het me ned chönne neh, wöus ke Ustrinkete het ge.
Der Oltner Polizeikommandant, sig – so seit me – chrank. Ir Beiz sitzt är, s`Bier i der Hand, dem Stadtrat sei Dank. Bis 60zgi chrank, dasch raffiniert und de aus Gsungne pangsioniert.
Bike, tuet s`Studer Marlis haut för`s Läbe gärn. Verunfaut eschs, dasch aber mies, mer glaube dasch gse färn. Es Zocke im Arsch, e Lähmig droht, sesch aber nor en elektrische Droht.
Dor s`Priska Pfluegers Chäuer springt es Müsli ganz elei. Äs wäg däm Müsli nach Loft ringt: “Wenn chonnt der Chrigu hei?“ Wäg dere Muus stigts uf e Tisch, zum Warte dört, bis Höuf cho esch.
Ar erscht Auguscht Fiir, dasch es Wonder, der Lori höuft au mit. Är stosst e Wage mit Abfauplunder, und dä bewegt sech net. Är chrampft und chücht – chas ned verstoh, mit glöster Handbräms würds besser go goh.
Der Gmischti Chor dä singt för öis, der Brönnima, dä seit: “Stöu s`Händi ab!“, dasch höt nüt Nöis, chuum het är das gseit. Do lütet s`Händi, oh la la vor Frou vom Walti Brönnima.
Am Fröschefäscht in Härchinge, der Lugi esch au do. Im Chrutzli wird d`Heifahrt scho glinge, das wird de scho no goh. Ohni Liecht fahrt är de spot no hei, so gseht ne nedmou d`Polizei.
Fahrsch quer dors Gäu vor de Wahle, säg e: “Nei aberau!“ Erläbsch aus Börger grossi Quale, Do stoht:“Bader zwöi mou!“ Einisch Bader esch scho vöu z`vöu, denn die esch z`Bärn jo nome stöu.
Der Präsi vo der Börgergmein, bout e ganze Block, und de no grad es Huus deheim, das het nor 1 Stock. “Der Wychäuer“, seit der Emil sech, “esch i mim Huus haut im Eschterich.“
S`Rita Büttiker, loset jetz, macht Säubschtöberlischtig. Goht fort ohni Schlössu, sesch eis Ghetz, grad wie jede Zyschtig. Der Oliv bschlüsst, s`Rita muess warte, bis z`Obe hingenoss im Garte.
Der Zottel vo der SVP, meckeret famos. Bringt der Partei 3 Prozänt meh, was esch eigentlech los? Als SVP – Ober – Nörgeli esch öis bekannt der Mörgeli.
Der von Arx Ärnscht – het e Rieseschranz, i de Hose gha. Vor Zugsabfahrt, är schiniert sech ganz, das chan eg so net ha. Är secklet am Bahnhof z Züri i Lade und verhindertet so no grössere Schade.
Am Wienerobe vom Chilechor, esches ganz guet gse. Im Kaffistöbli, stöu eg mer vor, sets au Chueche ge. Scho gli ke Chueche me, kei Sorte, am eis fingt me 50 Linzertorte.
Der Blocher esch nöm Bondesrot, wär hät das au dänkt? Es Schlömpfli wirft ihn usem Boot, und het ne schnäu versänkt. Eis macht öis Froue scho närvös, dasch im Evi Widmer si Coiffös.
So, der liebe Närrinne und Narre, mer ziehi hür no einisch der Fasnachtschare. Mer si überzügt, as e gueti Fasnacht get, vergässet der Alltag und machet aui met.
Der aui chöit nechs sicher vorstöue, s`hürige Motto esch speziell för d`Fröue. „Mer mache, was mer wei“, ned nome ar Fasnacht, drom liebi Manne, nämet nech in Acht.
Besch derby, machsch au wieder met, wenn`s au hür en Obernärrin get? Der Gmeinrot esch abgsetzt – aues wird guet, kei Schwanz überchonnt wäge däm e Wuet.
Mir risse d`Schiggane am Chäsiwäg wägg, mer schaffe ab d`Stüüre – e Supergägg. 5000 Franke för jede und jedi, uf Mallorca get`s hür die gröschti Kommeedi.
Wenn mer 5 länger am Rueder blibe, de get`s i der Zytig e Huufe z`schribe. Nöidedorf blöit uf – en Ufschwung setzt i, i de Beize get`s Gratisbier johrus und johry.
Als Rita II. stohn eg jetz do und lade öich i, a d`Aläss z`cho. Met em Startschoss hüt z`Obe fot aues a, Chesslete, Chinderchesslete si de am Donschtig dra.
Am Hotschibau mache mer au, was mer wei. Bis am Morge goht sicher niemer hei. Das esch e Sach i dere Haue, das wird bestimmt aune sehr guet gfaue.
Der Samschtig esch de för öisi Seniore. Im Chrüz goht`s luschtig zue wie ne Moore. Bim Werd esch Chinderfasnacht uf der Stross. Der gsäit, i öisem Dorf esch öpis los.
Am Sonntig esch z`Woufu Fasnachtsumzog. Nach Soledorn der gröscht, das esch ke Frog Am Strosserand Lüt, ope drütuusig. Hoffentlich esch s`Wätter ned grad lusig.
Nochem Umzog si mer de bim Ochse im Zäut. Do druf fröit sech die haubi Wäut. d`Duube Guuge – was wotsch no meh? Spöut dört denn uf för me und de.
Denn esch scho Mäntig met de Clique i de Beize, wo öis met erne Värse so richtig ungereheize. Au mer 5 Fröue töi dört singe und allerlei Schlimms us em Dorf uusbringe.
Am Zischtig esch Chindermaskebau. I der Haue esch de die gröschti Schau. Denn zeige d`Ching, was se drof hei, wenn aui mache, grad wie si wei.
Mit em Fasnachtsfüür esch die schönschti Zyt verby, und mer 5 müesse vo jetz wieder ganz Bravi sy. Mer lade öich i, chömed mached mit, as e unvergässlichi Fasnacht get.
Erläbet met öis 5 loschtigi Täg, schlofet chli vor und blibet mer zwäg. Vergässet d`Sorge, firet und lachet! Wär ned met macht, esch ned ganz bachet.
Chömet, fäschtet, heit`s guet metnang Und firet e ganzi Woche lang. I hoffe, ass jede vo öich Ferie het und erkläre d`Fasnacht 08 aus eröffnet.
Mer 5 sy nomou d`Obernaare (Marina, Marina, Marina)
Mer 5 sy nomou d`Obernaare, mer säge öich jetz grad worom. Mer zieih nomou am Fasnachtschaare, mer töi haut ganz gärn e chly domm.
Jetze töi mer los lo und chöi ändlech afo, mer wei öich jetz verzöue, was d`Fasnacht esch för öis.
Aus Ching scho esch för me d`Fasnacht haut s`Gröschte, e Maske z`sy esch höt no för me s`Schönschte. E cha de tue wie s`ganze Johr lang nömme, drom esch d`Fasnacht för öis die schönschti Zyt.
I d`Fasnachtszyt legg e mis ganze Härzbluet, die länge Nächt töi mer haut eifach so guet. Blybsch jong und schön, e be doch s`beschte Bischböu, drom esch d`Fasnacht för öis die schönschti Zyt.
Vo Hus zo Hus göi mer aus Maske aube, i jedem Hus gets mindeschtens e Haube. De töi mer grad wie d`Lümpe a de Stäcke, drom esch d`Fasnacht för öis die schönschti Zyt.
Einisch sy mer aus Gmeinrot unterwägs gse, hei d`Schuele gschlosse, d`Stüre gsänkt, was wotsch meh? Hei richtig blöd do, -- wie der Gmeinrot au scho, drom esch d`Fasnacht för öis die schönschti Zyt.
Der Männerchor sy mer emou go bsueche, der Dirigänt wird wüetig,-- fot a flueche. Mer Froue aber hei gha s`gröschte Gaudi, drom esch d`Fasnacht för öis die schönschti Zyt.
Mer 5 si nomol d Obernaare, mer hei öich jetz grad gseit worom. Mer zieh nomol am Fasnachtschaare, Mer töi haut ganz gärn e chli domm.
Jetze hei mer losglo und ou der chöit afo und denn chöit der verzöue, was d`Fasnacht esch för öich.
